تبلیغات
بالاجا خوخان - مطالب بالاجا خوخان

لطفا Internet Explorer  فایدالانین

بالاجا خوخان

یئنی آدرس

یازار: بالاجا خوخان   

خوخان سیته سی یئنی آدرسه داشینیبدیر

http://www.xoxan.ir


قارقا!

یازار: بالاجا خوخان   

 

بو گون حیطده خوخاننازلا آیاق جیزیق اویناییردیق. من ائله آتیلیردیم هااا قوش کیمی. هئی ده اوتوردوم. خوخانناز دا آتیلیردی امما تئز تئز آیاغی دوشوردو جیزیغین اوستونه. من چیغیریردیم: یاندین یاندین! سونرا دا حیطی بیر دووره قاچیب گولوردوم. او دا دوروب مظلوم مظلوم باخیردی. بئش دؤوره اوینادیق هامیسیندا من اوتدوم . هامیسیندا دا حیطی بیر دؤوره قاچیب « یاندین یاندین» دئدیم گولدوم! ائله خوش کئچمیشدی... ائله کئف ائله‌میشدیم هاا سون دؤنه قاچاندا بیردن قارقانین سسینی ائشیتدیم دونوب قالدیم! دیلیمین اوجونداکی «یاندین یاندین» دا دوندو باا. خوخانناز تععجوبله منه باخیب دئدی:

-         نه اولدو به؟

-         من سنی اینجیتدیم هئچ آخی؟

-         من نه دئدیم مگر؟

-         سن یوخ کـــــــــــی...

-         هن به؟

-         بو قارقا یالانچیدیی با . گئجه آتام گلنده اونا دئیه‌جک بالاجا خوخان یولداشینی اینجیدیب!

خوخانناز بیردن گولدو. سونرا قاچدی قارقایا ساری:

-         یوخ یوخ سنین ایشین اولماسین بیز یولداشیق اؤزوموز!

ائله سئویندیم هاا:

-         عوضینده من ده اوتوزارام ایکی دفعه. هن؟

-         هن اوتوز.

بیز یئنه اویناماغا  باشلادیق. قارقا آجیقلی آجیقلی باخدی بیزه. بو گئجه آتاما دئمه یه سؤزو یوخ ایدی دا!

ائندیر(انلود)


رسام : کؤنول رنجبر

ناهار پیشیرمک!

یازار: بالاجا خوخان   

آنا خوخان قوناق گئدیب. من له آتا خوخان اؤزوموزه ناهار پیشیریریک.سحرآنام گئدنده تاپشیریب آتادان گؤز اولام. من ده گؤز اولورام داا. آتا خوخان یئرآلما سویور. دئیرم:« وئر من سویوم!» دئیر:«پیچاق الینه دوشر.» محبتله اوزونه باخیرام بلکه نظری ده‌ییشدی. گولوب دئییر :«یــــــوخ» یادیما دوشور آنام یئر آلمالاری او یئکه قیرمیزی تاوایا تؤکر قاچیرام اونو تاپام. آتام دئییر:«هـــه سن اؤزونه اویناسان هرزاددان یاخشیدیر» من کابینتلری آختاریرام. او یئکه قیرمیز تاوا هاردادیر بس آخی؟! آتام اوتاقدان منه شعر اوخویور:«بالاجا قیزیم دو چای قوی...ائوی سوپور ناهار قوی! »

چیخیرام صندلین اوستونه اوستده‌کی کابینتی ده آختارام.

آتامین سسی گلیر:«بو قیز اولماسایدی من نئیلردیم!» قیرمیزی تاوانی آنام اؤزو ایله آپارماییب گؤره‌سن؟ میز لاخلاییر آیاغیمین آلتیندا... آنام دئمه‌سیدی آتاندان گؤز اول ائنیب گئدیب نقاشی زاد چکردیم باا. آتام یاواش یاواش نیگران قالیب مندن دئیه‌سن منی سسلییر:« قیزیم! آی قیزیم! گل گؤزومون قاباغیندا اوینا» بویوم بیرآزدا اوجا اولسایدی آچاردیم بو کابینئتی باا. صندل لاخلاییر ایندی یخیلسام نه پیس اولار آلـله! آتام یئنه چاغیریر. ایندی گلیب گؤررهااا منی...قیرمیزی تاوا هارداسان آخی؟ گووووووووووومب! گؤزومو آچاندا گؤرورم آتامین قوجاغیندایام! هله یاخشی ییخیلمامیشام!

رسام:کؤنول رنجبر

ائندیر(دانلود)

 

من ساییرام!

یازار: بالاجا خوخان   

 


منله خوخان آنا خط ماشینیندا اوتورموشوق. من یئریمی قاری خوخان خانیما وئرمیشم اونا گؤره ده آنا خوخانین دیزینین اوستونده‌ اوتورموشام. آنا خوخان دئییب من ماشینداکی خانیملاری سایینجا یئتیشه‌جه‌ییک. من ده ساییرام. بیر...ایکی...اوچ...دؤرد...سایدیغیم خانیملارین بیری یئنیر! اه! اوولدن ساییرام. بیر... ایکی ...اوچ...دؤرد...بئش...آلتی...بیردنه خانیم او بیرسینین دالیسیندا گیزله‌نیب.

-         او گیزله‌نن خانیمی دا ساییم آنا؟

-         هه سای قیزیم. هامینی سای!

-         یئددی ...سکگیز..دوققوز...خانیم بویانا گلمه‌یین من سیزی اویاندا سایمیشام!

خانیم تعجوبله منه باخیر. آنا خوخان دئییر:«اوشاقدیر داا باغیشلایین!» منیم سایلاریم بوتون قاریشیر! گرک باشدان سایام: بیر...ایکی...اوچ...دؤرد...یئریمی وئردیییم خانیم محبتله اوزومه باخیر. آنام دئییر:«یاواش سای هامی بیزه باخیر.» من یاواشلادیرام سسیمی آما یئنه ده سایلاریم قاریشیر. باشدان ساییرام: بیر..ایکی...اوچ...دؤرد.. بئش...آلتی...یئددی...قاباقدا اوتوران کیشیلردن نئچه‌سی دؤنوب محبتله اوزومه باخیرلار! خوخان آنام دئیر:« یاواش!»

-         یاواشلاداندا سایلار قاریشیر بااا...آنا او خانیم ایندی میندی یا بایاقدان اوردایدی؟

-         بیلمیرم!

-         ایندی اونو ساییم یا یوخ؟

-         سای فقط یاواش سای بااا

دالیمیزدا اوتوران خانیملارین بیری دئییر: سووووس! آنام دؤنوب دئیر:«باغیشلایین!» منیم سایلاریم قاریشیب دا! باشدان ساییرام: بیر...ایکی...اوچ...دؤرد...بئش...آلتی...

ائندیر(دانلود)

رسام:کؤنول رنجبر

آنا خوخان ایتیر!

یازار: بالاجا خوخان   

آنا خوخان  ایتیر!

بوگون من له آنا خوخان گئتمیشیک بازارچادان گؤی آلاق. بازارچا دا اوزون شولوق بیر یئردیر. بیز گئدنده هامی بیزدن قاباق اوردا اولار. قونشو خانیملار، آتا خوخانینی یولداشلاری، تویوق-خوروز ساتان عمی جان، مئیوه ساتان عمی جان، شیرنی ساتان عمی جان، باشماق ساتان عمی جان. بیرده بازارچانین لاپ شولوق یئرینده دوران گؤی ساتان عمی جان. گؤی ساتان عمی جان بیر عالمه گؤیون ایچینده دورار. هامی خانیملار دا اوشاقلاری نین اللریندن یاپیشیب دؤره سینده دورارلار.ائله گؤزل اولار!

بو گون ده گؤیلرین یانیندا دورموشدوق من گؤی ساتان عمی نین گؤیلرینه ایجازه سیز ال د‌َین اوشاقلارا چیغیریردیم کی ال وورمایین! آنام دا هئی الیمی چکیب دئیردی سنین ایشین اولماسین!

بیر آز واخت ائله بوجور کئچدی بیردن گؤردوم خوخان آنا داها منیم الیمی چکیب «سنین ایشین اولماسین» دئمیر. بیرده دالیما باخاندا گؤردوم آنا خوخان یانیمدا دئییل هئچ! ائله اوندا بیلدیم ایتیب آنام!

اوول آغلاماغیم گلدی سونرا گؤردم اوشاقلار یئنه گؤیلره ال وورورلار. آنا خوخاندا کی یانیمدا دئییلدی بیر دفعه اوجادان چیغیردیم: سیـــــــــــــــــــزه دئــــــــــدیم گؤیلره دَیمه یــــــــــــــــــــین!

بیردن آنا خوخان  سسیمی ائشیدیب  گؤیلرین ایچیندن باشینی قووزاییب منه باخدی!

دئمه بس آنام ایتمه میشدی!

ائندیر(دانلود)

رسام:کؤنول رنجبر ، مسعود سبزی

چکیرگه!

یازار: بالاجا خوخان   

چکیرگه!

آغاجلار لاپ تازا قیش یوخوسوندان اویانمشدیلار. بالاجا بالاجا یاشیل یارپاقلار بوداقلاردان چیرتلاییردی. من له آتام کردیمیزده بنؤوشه اکیردیک. من تورپاغی قازیردیم. آتام دئییردی ائله یوخ قیزیم! درینه گئتمه بالام! اورانی یوخ گیله‌م! حیه‌طی باتیردین!

من بنؤوشه لری قوتودان چیخارتماغا چالیشیردیم آتام دئییردی:  ساخلا ساخلا کؤکونو قیردین آ قیزیم! یاواش یاواش! ایندی سیندیرارسان!

من قووتودان چیخارتدیغیم بنؤوشه لری کردییه اکنده آتامین داها دؤزومو قالمامیشدی دئینن کیمی اولوردو:ازدین! آیاغینی اورا قویما! من تئز تئز «باش اوسته» دئییردیم. تئز تئز ده تربیه سیز  آیاغیم اؤز اوزونه  آتام اکن بنؤوشه لری ازیردی. بیردن آتام سوسدو. سونرا پیچیلدایا پیچیلدایا دئدی: تئز گل بورا باخ!

من تله سیک دؤندوم گؤرم نه دئییر. بیردن بیر دنه بیر زاد آتیلدی اوستومه! من دیکسینیب دالی دالی گئتدیم.  آتام دئیدی:

-         قورخما قورخما چکیرگه دی.

سونرا باشینی توولاییب گولومسندی:

-         آخیرده ازدین او بنؤوشه لری دینجلدین؟

چکیرگه یئکه گؤزلری ایله منه باخیردی. من بنؤوشه لرین اوستونده اوتورموشدوم.

ائندیر(دانلود)

قوناقباجی

یازار: بالاجا خوخان   

 

قوناقباجی

منله خوخانناز بیزیم ائویمیزده قوناقباجی اویناییریق.

بالاجا ائو دوزلتمیشیک. خوخانناز همیشه کی کیمی آناسینین گوللو چادراسینی سالیب باشینا. قولچاق بیر دنه دیر. نوبتله اونون آناسی اولوروق. خوخانناز قوناقدیر آنام تاپشیریب اول وئرم قولچاغی او گؤتورسون. قولچاغی ووروب قولتوغونا. من قابلامالاری دوزموشم گؤزله ییرم او تاخ تاخ دئیب قاپینی دویسون مثلن. ائله قولچاق قوجاغیندا اویان بویانا گئدیر. من ده تئز تئز بالاجا قابلامامین قاپاغینی گؤتوروب قویورام. گؤزله ییرم گلسین.

-         بــــــــــــــــــــــــــه گل داا!

-         بازاردان اوشاغا یئمک آلیرام گلم!

من قولچاقسیز قالمیشام. قابلامانین قاپاغینی بیرده گؤتوروب قویورام.

-         به قوناق گلمیرسن؟

-         گلیرم داا  یولدایام. ماشینا مینمیشم.

قولچاغیم خوخاننازین قوجاغیندا داریخیب. آز قالیر اویناماغی قاتسین. قابلامانین قاپاغی الیمده قالیب. آنام ایکی اووج نوخود-کیشمیش گتیریر:

-         بونلاری دا تؤک قابلاماندا قایناسین!

من قابلمانین قاپاغینی قوینجا خوخانناز قاپینی دؤیور: تاخ تاخ!

ائندیر(دانلود)

بایرام گؤروشو

یازار: بالاجا خوخان   

 

-         بویورون میوه یئین!

-         چوخ ساغ اولون!

-         شیرنی بویورون!

-         چوخ ساغ اولون!

آنا خوخان قویمور ائوین خانیمی منه میوه –شیرنی وئرسین کییی! من اوچ یول « بایرامیز موبارک» دئمیشم بایراملیغیمی گتیرسینلر هر دفع ده سؤز قاریشیب یادلاریندان چیخیب.

ائو یییه سی بیرده دئیر:

-         میوه دن بالاجا خوخانا دا وئرین!

آنام الینده پورتاغالی سویور منه وئرسین.

-         من آخی پورتاغال ایسته میر دیم کیی خیار ایستیردیم باا

آنا خوخان دوداغینی دیشلیییر. یانی دینمه! من پورتاغالی یاواش یاواش یئییرم. ائوین کیشیسی الینی آپاریر یومورتا قابینا ساری. من پورتاغالی چئینه یه-چئینه یه بیرده بایرامیز موبارک اولسون دئیرم. کیشی ازومه باخیب گولومسه نیر. وای دَده‌! پیس ایش اولوب دئیه سن هاا. آتا خوخان دا منه باخیر...دوداقلاریمی بوزوشدوررورم اوتاندیغیمدان آغلایام. کیشی قابدان بیر بویانمیش یومورتا گؤتوروب منه وئریر. وئره وئره ده اوجادان گولور. آتا خوخان دا گولور! هامی گولورلر. یاخشی من بایراملیق ایسته مه دیم هاا! 

ائندیر

بایرام گونو

یازار: بالاجا خوخان   

بایرام گونو

من دونومو گئییردیم. آناخوخان تیرمه بوخچانی آچمیشدی  یئره. آینانی گتیردی من قاچدیم الیندن آلام.
-         دَیمه قیز! قوی قویوم سوفره‌یه سن باخ اؤزونه گؤر گؤزل اولوبسان؟

آینادا اؤزومه باخدیم. تئلیمه ال چکدیم. ائلــــــــــــــــــــــــــــــــــه گؤزل اولموشدوم هااا

من اؤزمه باخا باخا آتاخوخان قورانی قویدو بوخچانین دوز اورتاسینا.

من ایلیدیم قورانین یئرینی دوزلدم.

-         دوشرسن سومه‌نی قابینین ایچینه بالام!

من مظلوم مظلوم آتامین اوزونه باخیب سوفره‌نینی ایچینه کئچه-کئچه دئدیم:

-         من دوشمرم. خوخانناز دوشر بااا.

قورانین یئرینی دوزلدندن سونرا هله دن-دؤش پیالالارینین دا یئرینی دوزلتدیم . مرجیلری قویدوم لوبیه‌لرین بو یانینا. سونرا اؤزومه بایرام شعری اوخودوم:

-         نه ده گؤزل! نه ده گؤزل! بایرام بایرام!

بیردن یادیما دوشدو گؤره‌سن بو مرجیلری،لوبیه لری، نوخودلاری  نه‌یه قویموشوق بورا؟

-         مهریبان آنام بیز یئیریک بونلاری؟

-         یوخ قیزیم سوفره یه دوزوروک داا

-         سونرا یئییریک؟

-         سونرا برکتلنسینلر قایتاراق قابلارینا.

-         قابلارینا؟

-         هن دا کهلیک قیزیم! ایندی تئز اول سوفره‌دن چیخ ائشییه. تحویل اولار سن سوفره‌ده قالارسان هااا!

من شعر اوخویا اوخویا سوفره‌دن چیخدیم:« سونرا قابا گئتسنلــــــر...سونرا قابا گئتسینلر».

دولمامیز اوجاقدا قایناییردی. اوتوردوق سوفره نین باشیندا.  بیز دوعا اوخوردوق  بیردن تیلویزیونداکی کیشی چیغیردی: عزیزی خوخانلار بایرامیز موبارک! من گولدوم. موبارک موبارک دئیدیم

 آتام قورانی آچدی. پول قویموشدو ایچینه. منه توتدو دئدی گؤتور بو سنین بایراملیغین. ائلــــه سئویندیم ائله سئویندیم آاااا آتیلدیم خوخان آتامی قوجاقلادیم.

ائندیر

آخیر چارشنبه

یازار: بالاجا خوخان   

 

 

آخیر چارشنبه

«سوپورگه آلاق... اوزرلیک آلاق...دوز آلاق... آینا آلاق... بالاجا خوخانا چرشنبه‌لیک آلاق»، آتام بونلاری دئییب مهریبان مهریبان منیم اوزومه باخدی! من آتیلیب قوجاقلادیم آتامی سونرا تئز گئدیب قاپینین چیینینده دوردوم یانی به گئدک دااا به!

بازار شولوق! هامی قاچیر اویان بویانا. من بیر الیمله آنامین الیندن یاپیشمیشام بیر الیمله ده آتامین الیندن.

اول سوپورگه‌نی آلدیق. سوپورگه‌چی کیشی تر-تله‌سیک بیر دانا سوپورگه وئردی الیمیزه. دوز خیابانینی تیمینده بیردانا قویوق ساتان دورموشدو الینده اووووووووووووه نم نقدر گؤزل قویوق! من باخدیم قویوقلارا آتامین الینی چکدیم کیشیه ساری.

- دور آغانین پولونو وئریم قیز!

دوردوم. قویوق ساتان قویوقلارین ایکیسینی گؤزومون قاباغیندا ساتدی. من اؤز سئودیییم قویوغو سئچیردیم. بیردن گؤردوم آینا ساتان توکانینین قاباغینداییق. یئنه آتامین الینی چکدیم.

- دور آغانین پولونو وئریم قیز!

قویوق ساتان بیر دانا دا ساتدی. من ائله ادبلی خوخان اولموشدوم گؤزله‌دیم آتام اؤزو دئسین گل گئدک سنین ده چرشنبه‌‌لیینی آلاق. آغزیندان بو سؤز چیخان همین قاچدیم قویوق ساتان کیشیه ساری. من سئون قویوق لاپ باشدایدی. اؤزوده یاشیل- ساری قویوق ایدی. قویوغو کیشی وئردی الیمه. من کئف ائله دیم. قوللاریمی قوش کیمی آچیب قاچماق ایسته دیم. بیردن گووووووووووووووووووومب!

باغریم چاتلادی هاا. خیاباندا پیس ایش اولماسایدی آغلایاجاق ایدیم. آنام اییلیب قوجاقلادی منی:

- قورخما قیزیم تاراققادیر. بئله واختلار سن ده گول باا.

یاشیل-ساری قویوغا باخدیم. آنام دوز دئیردی. قویوق دا قورخماق یئرینه گولموشدو!

ائندیر(دانلود)

بایرام دونو

یازار: بالاجا خوخان   

بایرام دونو

آتام ایله چؤرک چی دن گلیردیک کوچه‌میزین باشیندا، قونشوموزون قیزی خوخانناز قاچدی قاباغیما

- هله کی یاندی قیندی منیم بایرام دونوم وار!

ایسته دیم جاواب وئرم آتام الیمی چکدی گیردیک ائوه. دیلیمین اوجوندا بیر دانا تربیه سیز سؤز قالمیشدی. اورگیم ده سیخیلیردی.

آنام: نه یه بس بئله قاش قاباقلی؟

- خوخان نازین بایرام دونو وار!

آنام دینمه دی. من بورنومو چکدیم. تربیه سیز سؤز ائله دیلیمین اوجوندا قالمیشدی.

بیر ساعات سونرا آنام بوخچاسینی آچیب قیرمیزی دونونو چیخارتدی:

- دور بونو گئی بالام.

دونو تاخدیم اینیمه. آتام باخیب گولدو:

- هاردا ایتدی منیم قیزیم؟

- دونون ایچینده یم آتا!

آنام دا گولدو. دئدی چیخارت. چرخینی یئره قویدو.

قیم قیم قیم قیم.

دون کیچیلدی.

قیم قیم قیم قیم

دون گؤزللشدی.

ائندیر(دانلود)

خوخان بایرام ایشی!

یازار: بالاجا خوخان   

خوخان بایرام ایشی!
بیرگون سحر یوخودان دوردوم گؤردوم آنا خوخان باشینا دستمال باغلاییب دوووارلاری سیلیر:
- سلام آنا. نئلیرسن؟
- سلام گیلم! بایرام ایشی گؤرورم.
- یانی نئجه؟
- دووارلاری سیلیرم.
- من ده سیلیم؟
- سن هله گئت چای-چؤرگینی یئ!
گئتدیم حیطده ال-اوزومو یووام گؤردوم آتا خوخان حیطده کردیلری ساهمانلاییر.
- نئیلیرسن آتا؟
- بایرام ایشی گؤرورم دا
- نئجه یانی؟
- حیطی ساهمانلاییرام. کردیلری اکیرم!
- من ده گلیم کؤمک ائله‌ییم؟
- سن هله گئت چای چؤرک یئ.
چای-چؤرگی تئز هام هام ائله‌دیم قاچدیم گؤرم آنام نه ایش گؤرور.
آنام منی گؤرجک دئدی:
- گؤزل بالام دویونجا یئدین؟
- یئدیم.
- سوتونو ده ایچدین؟
- ایچدیم!
- قاچ دووار دیبیندن او سوپورگه‌نی گتیر گل.
قاچدیم. خوخان آتام حیطده بئللیردی کردیمیزی.
- یورولما آتا!
- ساغ اولسون ککلیک قیزیم!
سوپورگه الیمده ائوه گلدیم.
- من سوپوروم آنا؟
- اوست- باشینی توز ائدرسن
- ائتمرم!
- دوز-تؤره‌لی سوپوره  ‌بیلمزسن.
- سوپوره ‌بیلرم!
- او دستمالی باغلا باشینا سوپور گؤرک!
دستمالی باغلادیم.سوپورگه نی محکم یاپیشدیم چکدیم فرشین اوستونه. بیر- ایکی  سوپورگه..اوچ-دؤرد سوپورگه...آتام حیطدن گلیب منه باخدی:
- آلله شوکور منیم قیزیم بؤیویوب!
من اورگیمده کئف ائله‌دیم آمما باشیمی قووزامادیم:
-  بئش- آلتی سوپورگه..یئددی- سککیز سوپورگه... بایرام ایشی سوپورگه...


 

ائندیر(دانلود)

 

سلام
من تک ایدیم. بالاجا تک خوخان ایدیم . آنام بورانی منه آچدی شعر اوخویام... نقاشی چکم... سیزی گؤرم...یولداش تاپام... کیم منله یولداش اولور؟